20. maí

Þriggja ára afmæli Social Coffee í Uppsveitum Árnessýslu

Þriggja ára afmæli Social Coffee í Uppsveitum Árnessýslu
Social Coffee í Uppsveitum Árnessýslu hélt nýverið upp á þriggja ára afmæli sitt. Að baki verkefninu standa þrjár öflugar konur, þær Birgitta María Braun, Eva Jodasová og Barbora Fialová, ásamt traustum hópi sjálfboðaliða sem hefur stutt starfsemina frá upphafi: Agnieszka Karczmarczyk, Antanas Sakinis, Lucie Jírová og Milos Zajíc.

Social Coffee hefur á þessum þremur árum fest sig í sessi sem reglulegur samfélagsviðburður í Uppsveitunum þar sem öllum íbúum, óháð aldri eða uppruna, er boðið að koma saman, kynnast og njóta samveru.

„Það sem gerir íslenska samfélagið svo sterkt eru félagsleg tengsl, en það er ekki endilega auðvelt fyrir fólk af erlendum uppruna að komast inn í djúpgróið samfélag. Hér í Uppsveitunum er hátt hlutfall íbúa af erlendum uppruna og því mikilvægt að skapa vettvang þar sem fólk getur hist, myndað tengsl og fundið sig velkomið,“ segir Birgitta María Braun.

Hún segir jafnframt að Social Coffee hafi átt í nánu samstarfi við Planet Laugarvatn sem stendur fyrir fjölbreyttum menningarviðburðum á Laugarvatni.

„Það er bæði skemmtilegt og hvetjandi að finna aukinn stuðning frá sveitarfélögum og fyrirtækjum í nágrenninu og að sjá myndast tengslanet a milli samtakanna og íbúana" bætir hún við.

Á viðburðum Social Coffee kemur fólk saman yfir kaffibolla, en einnig hefur verið boðið upp á fjölbreytta dagskrá í gegnum tíðina. Þar má nefna árstíðabundna viðburði á borð við Hrekkjavöku, aðventuhátíðir og Stóra plokkdaginn á vorin, auk borðspilakvölda, föndurs og tónlistarviðburða.
Nýverið lauk einnig prjónanámskeiði þar sem þátttakendur lærðu að prjóna íslenska lopapeysu þar sem alls 15 konur tóku þátt frá ólíkum heimshornum.

Fram undan eru fjölmargir spennandi viðburðir á vegum Social Coffee

Nýbúið er að halda Stóra plokkdaginn í Reykholti, þar sem boðið var upp á súpu að loknu verki dagsins. Stefnt er á tónlistaviðburð á bókasafninu á Flúðum og alþjóðlegt matreiðslunámskeið í samstarfi við Slow Food í haust. ásamt fleiri verkefnum sem nú eru í undirbúningi.
Næstkomandi helgi (24. maí) er síðan fyrirhugaður Stóri Plokkdagurinn á Laugarvatni sem endar með viðburði í Eldskálanum á Laugarvatni.

Mynd: Þeim Eva Jodasová, Barbora Fialová, Birgitta María Braun og Agnieszka Karczmarczyk voru færðar þakkir frá byggðaþróunarfulltrúa Uppsveita Árnessýslu fyrir hönd sveitarfélagana í Uppsveitunum fyrir þá ástríðu og seiglu sem þær hafa sett í þetta glæsilega verkefni.
Frá vinstri: Agnieszka Karczmarczyk, Eva Jodasová, Barbora Fialová, Birgitta María Braun og Rakel Theodórsdóttir byggðaþróunarfulltrúi Uppsveita Árnessýslu

Ljósmyndari: Antanas