Kóngsvegur
Þjóðvegurinn frá Þingvöllum um Laugarvatn að Geysi og Gullfossi.
Í bæði Njálu og Sturlungu er þess getið að þjóðhöfðingjar lögðu leið sína á Alþingi um þennan veg. Árið 1907 var fyrst ruddur vagnvegur þarna yfir, það var gert í sambandi við komu Friðriks VIII, Danakonungs. Síðan hefur hann verið nefndur kóngsvegurinn. Einnig voru lagðar brýr yfir Brúará, Tungufljót og Hvítá til að auðvelda leiðina.
Framundir 1940 gátu bílar farið þessa leið, en þá var hætt að halda veginum við. Hluti af veginum er í notkun enn í dag, en það er sá vegur sem í daglegu tali er nefndur Gjábakkaháls. Sá vegur er oft mjög ógreiðfær.
Þrasaborgir heita þar sem heiðin er hæst (404m) þar vottar fyrir gamalli gígskál. Frá þessari leið er líka hægt að skoða t.d Tintron, Stóra- og Litla Dímon og Laugarvatnsvellina.
Steinninn Latur er í 2,5 km fjarlægð frá Laugarvatni á leið til Þingvalla. Þetta er fallegur grágrýtisklettur, 130-140 cm hár. Hann er 12-14m ofan við veginn. Nafnið Latur er komið af því að menn hvíldu sig gjarnan við steininn á leið sinni frá Laugarvatni að Laugarvatnsvöllum. Þegar núverandi vegur var lagður var steinninn í vegarstæðinu svo vegagerðarmenn ruddu honum úr vegi. Fljótlega fóru undarleg atvik að gerast s.s.tæki að bila og menn að veikjast. Þeir sem við verkið unnu færðu steininn á núverandi stað og þá fór allt að lagast aftur.
Austari hluti Kóngsvegarins er einnig falleg og skemmtileg gönguleið, með útsýni yfir láglendi Laugardalshrepps. Hægt er að fara upp hjá Laugardalshólum og ganga austur yfir gömlu brúna á Brúará og alla leið að Úthlíð í Biskupstungum. Þessi spotti er vel greiðfær gangandi fólki og hestamönnum.
Kóngsvegurinn stytti vegalengdina frá Geysi að Þingvöllum um 24 km. Sumir segja að þessi leið sé sú fallegasta sem hægt er að fara frá Þingvöllum um Gjábakkaháls og Laugardal að Geysi.