Flúðir
Þegar komið er inn fyrir fjöllin Miðfells- og Langholtsfjall er komið í miðja sveit og norðan undir Miðfellsfjalli eru Flúðir, sem er sífellt vaxandi þéttbýliskjarni. Íbúar hreppsins eru tæplega 700 og eru allgóðir atvinnumöguleikar fyrir fólk.
Vegna jarðhita og frjósamra jarðlanda eru góðir möguleikar til að stunda garðyrkju enda má sjá, þegar maður keyrir um þorpið, að víða eru garðyrkjustöðvar. Einnig eru nokkur iðnfyrirtæki á Flúðum og eru þau Límtré, Flúðasveppir, Flúðaplast og Funaplast en stærstu fyrirtækin eru Flúðasveppir og Límtré.
Fyrir ferðamenn er Hrunamannahreppur tilvalinn afþreyingastaður. Þar er að finna hótel, félagsheimili, verslun, sundlaug, tjaldsvæði og banka svo eitthvað sé nefnt. Einnig er ágætis móttaka fyrir ferðamenn á hótelinu, þar sem fólk getur fengið góðar upplýsingar.
Sumarbústaðabyggð, sem nefnist Ásabyggð er rétt norðaustur frá Flúðum og stendur hún í hlíðum Högnastaðaáss. Meðal annarra á Kennarasamband Íslands þar orlofshús.
Eins og áður sagði er mikill jarðhiti í hreppnum og árið 1927 var leitt heitt vatn inn í fyrsta bæinn til upphitunar og annarra heimilisþarfa. Að sjálfsögðu var það mjög mikill kostur að hafa heitt vatn en nú til dags er heita vatnið notað mjög mikið og hafa verið boraðar margar holur sem gefa frá sér heitt vatn. Á því svæði sem mest var um jarðhita var reistur heimavistarskóli árið 1929 og var hann að sjálfsögðu upphitaður með jarðhita. Eftir að heimavistarskólinn var byggður tók nýbýlum að fjölga jafnt og þétt og byrjaði að myndast nokkurs konar þéttbýliskjarni. Auk nýbýlanna og skólans var reist félagsheimili og sundlaug nokkru síðar.
Meðan seinni heimstyrjöldin geisaði voru ýmsir dýrgripir Landsbókasafns Íslands geymdir á Flúðum í öryggisskyni ef loftárás eða aðrar hernaðaraðgerðir yrðu í Reykjavík. Ýmsir fleiri sögulegir atburðir hafa gerst í Hrunamannahreppi eins og til dæmis þegar hinar merku rústir frá þjóðveldisöld fundust. Í rústunum var að finna baðhús og einnig fannst þar rómverskur peningur frá tíma Tacitusar, einn fárra sem fundist hafa hér á landi.
Á Flúðum er mjög athyglisvert byggðasafn. Það er á bænum Gröf og þar er hægt að finna mikið af gömlum gripum, sem hafa verið í notkun á fyrri öld. Sá maður sem átti safnið og stofnaði hét Emil Ásgeirsson. Hann hafði mikinn áhuga á minjasöfnun og tókst honum að safna mörgum merkilegum hlutum og þannig bjarga þeim frá glötun. Í safninu er m.a. hægt að finna dýrmætt safn gamalla ljósmynda af bæjum í Hrunamannahreppi og hvergi á landinu finnst jafn fullkomið safn heyvinnuvéla.
Í Hrunamannahreppi voru tvö rjómabú og voru þau stofnuð vorið 1900, á Syðra-Seli og í Jötu. Í raun voru þetta nokkurs konar mjólkurbú því þau tóku við allri málnytinni úr ám og kúm en ekki aðeins rjómanum. Í báðum búunum var unnið með sama hætti: unnið var úr rjómanum en undanrennan send heim. Á þriðja ári var öll starfsemin flutt að Áslæk og var starfsemi þar lögð niður 1926.