Nesjavellir
Nesjavellir eru hluti háhitasvæðis sem tengist eldstöðvakerfi Hengilssvæðisins. Að loknum viðamiklum rannsóknum á Nesjavöllum ákvað Hitaveita Reykjavíkur að reisa þar orkuver og var Nesjavallavirkjun vígð 29. september 1990.
Orkuverið að Nesjavöllum er hannað fyrir 400 MW hámarksframleiðslu, en nú er framleiðslugeta þess um 200 MW. Rennsli heits vatns frá stöðinni er 500-800 sekúndulítrar (l/sek) og rennur það í leiðslum til tveggja geyma á Reynisvatnsheiði, sem samanlagt taka 18 milljónir lítra.
Alls hafa 18 holur verið boraðar á Nesjavöllum en einungis 13 þeirra eru nýtanlegar. Hver borhola gefur um 60 MW og þar af eru 30 MW nýtanleg, varmaafl hverrar borholu dugir til hitunar 7500 manna byggðar.
Nesjavallavirkjun sér íbúum Stór-Reykjavíkursvæðisins fyrir varmaorku, en auk þess hafa náttúruunnendur loksins uppgötvað Nesjavalla- og Hengilssvæðið sem útivistarparadís. Fjöldi gönguleiða er um svæðið og margt markvert er að sjá, m.a. er sagt að sjá megi fjórðung Íslands ofan af Hengli.