Sólheimar í Grímsnesi
Jörðin hét upphaflega Hverakot og var byggð úr landi Hamra. Mestur hluti lands Sólheima er mýrlendi og það liggur í gróðursælli kvos.
Á Sólheimum er heimili fyrir fatlaða, þar búa um 40 heimilismenn. Þeir hjálpa til við starfsemina á staðnum.
Sólheimar voru stofnaðir árið 1930 af barnaheimilisnefnd Þjóðkirkjunnar og Sesselju Sigurðardóttur, sem byggði starfsemina upp.
Að Sólheimum er starfrækt Gróðrastöðin Ölur. Þar er ræktað úrval af trjáplöntum, runnum og blómum til sölu og skógræktar. Þar er einnig Garðyrkjustöðin Sunna og er þar ræktað alls kyns grænmeti. Öll ræktun á Sólheimum er lífræn, en Sólheimar eru frumkvöðlar lífrænnar ræktunar á Íslandi. Í framhaldinu er stefnt að því að setja á fót lífræna áburðarverksmiðju á Sólheimum.
Uppbygging annarrar starfsemi en garðyrkju hófst á áttunda áratugnum en þá hóst starfsemi kertagerðar, vefstofu og smíðastofu.
Framleiðsluvörur frá Sólheimum eru seldar á staðnum. Þar má finna grænmeti, handsteypt kerti, mottur, dúka, silkikort, handmálaðan gjafapappír og annað handverk.
Á Sólheimum er gistihús, bankaþjónusta, göngustígar og sundlaug. Jafnframt hefur verið komið upp höggmyndagarði á Sólheimum, nú hafa verið settar upp um 8 höggmyndir en ákveðið er að koma upp 10 höggmyndum eftir jafn marga listamenn.