Vígðalaug
Á Laugarvatni, við vatnið er heit laug sem nefnd hefur verið Vígðalaug. Í laug þessa rennur lítill hveralækur sem er 35-40°C heitur.
Laugin er hlaðin úr grjóti, u.þ.b. 1,9 x 1,5m í þvermál, 60 cm djúp og sporöskjulaga. Laugarvatn og Laugardalur draga nafn sitt af þessari laug en áður hét hún Reykjalaug og er talin hafa dregið nafn sitt af bænum sem menn halda að hafi heitið Reykir. Ekki er vitað nákvæmlega hvenær Vígðalaug var hlaðin, en líkur benda til þess að hún sé frá landnámi Laugardals.
Á Alþingi á Þingvöllum árið 1000 (eða 999) tóku Íslendingar kristna trú og þurfti þá að skíra menn. Menn vildu ekki láta skíra sig upp úr köldu vatni og var því Vígðalaug (þá Reykjalaug) valin til skírnarinnar. Var laugin því vígð af prestum frá Noregi sem voru hér á landi þegar kristni var lögtekin.
Austan við laugina eru 6 stórir steinar sem nefndir hafa verið Líkasteinar. Á þá voru að sögn lagðar líkbörur þeirra feðga, Jóns Arasonar og sona hans Björns og Ara, sem hálshöggvnir voru í Skálholti árið 1550 og voru lík þeirra þvegin upp úr Vígðulaug.
Vígðalaug og Líkasteinar eru nú á skrá yfir friðlýstar minjar í Árnessýslu.