Ath. Þetta er texti frá nemendum ML skrifaður í verkefninu Íseldur c.a. 1997
Haraldur Matthíasson er nú látinn
Texti:
Fræðimaður og náttúruunnandi
Haraldur Matthíasson er kennari að mennt. Skriftir eru stór hluti af lífi hans, og hefur hann gefið út þó nokkuð margar bækur.
Einnig hefur hann þýtt að minnsta kosti eina yfir á íslensku.
Haraldur fæddist 16. mars 1908 í Háholti, og ólst hann upp í Skarði í Gnúpverjahreppi. Hann er kvæntur Kristínu Sigríði Ólafsdóttur og eiga þau saman fjögur uppkomin börn.
Haraldur og Kristín fluttust á Laugarvatn árið 1951, sama ár og Haraldur hóf störf við Héraðsskólann. Árið 1953 fluttu þau í húsið sem þau búa í núna og það sama ár hóf hann kennslu við Menntaskólann að Laugarvatni, sem var stofnaður það ár. Hann kenndi í Menntaskólanum þangað til árið 1982: helst íslensku og sögu, bæði Íslands- og mannkynssögu. Einnig kenndi hann náttúrufræði, dönsku og latínu.
Haraldur byrjaði að ferðast með Ferðafélagi Íslands árið 1940 og er enn þann dag í dag skráður félagi. Nokkrum árum eftir að Haraldur gekk í félagið tók hann að sér að skrifa árbækur fyrir það. Alls hefur hann skrifað fjórar árbækur sjálfur og hjálpað til við að skrifa nokkrar aðrar.
Haraldur hefur skrifað fleiri bækur, til dæmis Landið og Landnáma sem er í tveim bindum og fjallar um staðhætti í Landnámabók, og Perlur málsins, sem fjallar um samanburð á nútímaíslensku og forníslensku. Honum fannst skemmtilegast að vinna við bókina Landið og Landnáma.
Þegar háskólaprófi lauk hjá Haraldi árið 1951 byrjaði hann á doktorsritgerð sinni sem fjallar um tilvísunarfornöfn og lauk hann henni árið 1959. Í lok viðtalsins spurðum við Harald hvað hann væri að gera þessa dagana? Hann sagði:"Það er nú ekkert sem maður talar mikið um, en maður er alltaf að skrifa eitthvað"